اهداء لكل الكوامر ==كتب بروف محمد عبدالله إ

……
*السودانيين بيدوك إحساس بالموت قبل يومك…*
يعنى من عمرك يعمل 55 داخل على60 ، 65 برقدوك فى الديوان طوالى (والموضوع ده بمنتهى الحب)… يا ابوى أنت ما تطلع أى حته ولو عايز أى حاجه نحنا بنجيبها ليك لغاية عندك ….

وترقد فى الديوان لغاية ما ركبك يتيبسن (بمنتهى الحب).. ويحضروا ليك الجلابيه لصلاة الجمعه… وولدك يجيب ليك عكاز هدية… وبتك تجيب ليك شال لزوم هيبة ووقار راجل عجوز وتقش بيهو عيونك مره مره (بمنتهى الحب)…
فى المناسبات تشيل مفاتيح البيت وتمشي تحضر العقد وترجع تحرس البيت ، ما هم فى بيت العرس… وبيجيبوا ليك الأكل فى البيت دا اذا ماعملوا ليك أكل براك…. وإذا هفت ليك وحضرته الحفله الناس يقولوا عليك راجل كبير زى ده بيعمل كدا مالو ؟؟

منجعص فى نص الحفلة…. وبناتك يسمعن الكلام ده يقومن يبكن… تقوم انتا تخجل وتشيل شالك ومفاتيحك وتمشي تنوم (بمنتهى الحب)….

تعال شوف لو أنت عيان يتاوقو ليك بالشبابيك وأنت بتسمع فى كلامهم أكل ؟!! ما أكل شرب !!!؟ ماشرب…. وتعال شوف البكاء والأحضان لغاية ما تصدق إنك مفترض تموت (بمنتهى الحب)….

أنا الكلام ده قلتو لى أهلي لو عايزين بعد ال60 تعملوا معاي برنامج زى ده.. مستحيل….
أنا عندى سباحة وعجلة وبحب رياضة المشي وعلى الطلاق في ديوان ما برقد… وبحضر العقد.. والحفلة كان بقت بعشة الجبل وللا مروة الدولية اوريكم الرقيص الما خمج…. وإحتمال تاني يوم أحضر الصبحية كان قدرتا وركبي شالوني..!!!